Bəzən yarımçıq evlilik, yaxud boşanmalardan sonra tərəflərin bir-birinə toya qədərki dövrdə verdiyi qızıl-zinət əşyaları üstündə dava düşür. Bəs görəsən bu məsələ hüquqi baxımdan necə tənzimlənir?


Newscenter.az-ın xəbərinə görə, hüquqşünas Vəfa Qədirova deyib ki, Azərbaycan Respublikası Ali Məhkəməsinin qərarına əsasən toy baş tutmadığı təqdirdə nişan zamanı tərəflərə verilmiş qızıl-zinət əşyaları geri qaytarılmalıdır:

"Məhkəmənin əsaslandırmasına əsasən qızıl-zinət əşyalarının geri qaytarılmaması isə əsassız varlanma kimi qiymətləndirilmişdir.

Mülki Məcəllənin 1091-1092-ci maddələrinin tələblərinə əsasən əsassız varlanan o şəxs sayılır ki, hüquqi əsas olmadan başqa şəxsin hesabına əmlak əldə etsin".

Vəfa Qədirovanın sözlərinə görə, əsassız varlanma yalnız o zaman baş verir ki, bu cür varlanmaya haqq qazandıran qanuni əsas və ya müqavilə əsası olmur:

"Hüquqi əsas olmadan varlanma həmçinin o hallarda baş vermiş sayılır ki, bu cür varlanma həyata keçirilməmiş əsasa və ya sonralar aradan qalxmış əsasa söykənir.
Varlanmış şəxs əldə etdiklərini məhrum olanın tələbi ilə ona qaytarmalıdır!".

Mehman Mehdiyev