İnsan münasibətlərinin əsasında eyni bir həqiqət dayanır: ailədə də, dostluqda da, cəmiyyətdə də alovlu varlıq yalnız hisslə deyil, sədaqətlə ölçülür. Həqiqi bağlılıq sözlə yox, dar gündə göstərilən mövqe ilə tanınır. Məhz buna görə qəhrəmanlıq da sadəcə döyüş meydanında deyil, insanın öz vətəninə, öz xalqına və öz mənəvi borcuna necə sahib çıxmasında yaşayır.

Bu gün Azərbaycanın Milli Qəhrəmanı Albert Aqarunovun anım günüdür. Lakin bu il həmin günün şənbə gününə təsadüf etməsi səbəbindən, yəhudi dini qaydalarına görə şənbədə heç bir iş görülmədiyi, qəbir ziyarəti və mərasim keçirilmədiyi üçün biz Albert Aqarunovu bu gün ziyarət etdik. Bu ziyarət sadəcə bir ehtiram nümunəsi deyil, həm də mənəvi yaddaşın yaşadılmasıdır.

Albert Aqarunov yəhudi əsilli olsa da, öz taleyini Azərbaycanla birləşdirən, bu torpağı “mənim Vətənimdir” deyə sevən, onu qanı və canı ilə müdafiə edən böyük bir şəxsiyyət idi. Onun həyatı bizə bir həqiqəti öyrədir: Vətən sevgisi milliyyət sərhədi tanımır, çünki həqiqi vətəndaşlıq qandan əvvəl vicdanda doğulur. İnsan haranı öz ruhunun evi bilirsə, onun müdafiəsi də artıq sadəcə borc yox, mənəvi and olur.

Qəhrəmanlardan danışmaq keçmişi yada salmaq üçün deyil, gələcəyin mənəvi istiqamətini itirməmək üçündür. Bu da əslində fəlsəfəli diplomatiyanın əsaslarından biridir: insanı mənsubiyyəti ilə deyil, sədaqəti ilə dəyərləndirmək, fərqliliklər içində birliyi görmək, yaddaşı isə ayrılıq yox, qardaşlıq körpüsünə çevirmək. Albert Aqarunovun xatirəsi də bizə məhz bunu deyir Vətənə sevgi insanı ucaldan ən ali həqiqətdir.

David Seliverstov,
Qlobal Həmrəylik Şurasının Qafqaz üzrə nümayəndəliyinin rəhbəri, beynəlxalq hüquq müdafiəçisi, Qafqaz Yəhudiləri Assosiasiyasının Azərbaycan nümayəndəliyinin rəhbəri