"Azərbaycan Respublikasının Prezidenti İlham Əliyevin Əlcəzairə səfəri ölkəmizin ərəb dövlətləri ilə əlaqələrinin inkişaf etdirilməsi baxımından mühüm əhəmiyyət kəsb edir".

Newscenter.az xəbər verir ki, bu fikirləri "Milli İnkişaf" İctimai Birliyinin sədri, politoloq Arzuman Muradlı səsləndirib. O bildirib ki, Azərbaycan təkcə yaxın qonşuları, eyni coğrafiyada yerləşən dövlətlərlə deyil, eyni zamanda Avropa və Asiya qitəsinə daxil olan ölkələr, o cümlədən müsəlman aləmi ilə çox sıx əlaqələr qurur:

"Məhz bu əlaqələrin nəticəsidir ki, Cənab Prezidentin də dediyi kimi 44 günlük Vətən müharibəsində müsəlman dövlətlərinin əksəriyyəti Azərbaycanın haqq işini, apardığı mübarizəni müdafiə etdi, bizə öz mənəvi dəstəklərini nümayiş etdirdilər".

Arzuman Muradlı onu da qeyd edib ki, dövlət başçısının Ərəb Dövlətləri Liqasının 31-ci Zirvə toplantısına fəxri qonaq kimi dəvət edilməsi də bu təşkilatla Azərbaycanın əməkdaşlığının yüksək səviyyədə olduğunu təsdiqləyir:

"Heç şübhəsiz ki, bunun kökündə təkcə Azərbaycanın bir müsəlman dövləti olması deyil, ölkəmizdə dini tolerantlığın ən yüksək səviyyədə təmin edilməsi dayanır".