Rusiya Azərbaycanla sərhəddə yerləşən Yaraq-Kazmalyar sərhəd-keçid məntəqəsində hərəkət sxemini dəyişib.

Newscenter.az APA-ya istinadən xəbər verir ki, bu barədə Rusiya Federasiyası Nəqliyyat Nazirliyinin mətbuat xidməti məlumat yayıb.

Buna səbəb Rusiyaya gedən iritonnajlı yük maşınlarının çoxluğudur.

“Azərbaycandan Rusiyaya gedən yük avtomobillərinin sayının artması ilə əlaqədar noyabrın 17-nə kimi Yaraq-Kazmalyar avtomobil buraxılış məntəqəsində müvəqqəti olaraq hərəkət qrafiki dəyişdirilib”, – deyə məlumatda deyilir.

Yük daşımaları üçün bütün zolaqlar avtomobillərin Rusiyaya daxil olması üçün istifadə olunur.

“Yük avtomobillərinə Rusiya Federasiyası ərazisindən Azərbaycana çıxışı üçün qonşu Tahirkənd-Kazmalyar keçid məntəqəsindən istifadə etmək tövsiyə olunur”, – deyə mətbuat xidməti əlavə edib.

Qeyd edək ki, Rusiya ilə Azərbaycan arasında iki gömrük-keçid məntəqəsi fəaliyyət göstərir. Birincisi, “Samur” gömrük postu, Xaçmaz rayonunda yerləşir. Rusiya tərəfində keçid məntəqəsi Yaraq-Qazmalar adlanır.

İkincisi isə “Xanoba” gömrük postudur, o, Qusar rayonunda yerləşir. Bu keçid məntəqəsi Rusiya ərazisində Tahirkent-Qazmalar adlanır.