Qardaş Türkiyədə terror aktı həyata keçirilib. İstanbulun mərkəzində, Taksimdə törədilmiş partlayış nəticəsində onlarla dinc vətəndaşımız həyatını itirib və yaralanıb. Qardaş Türkiyə xalqına başsağlığı verir, həyatını itirmiş şəxslərin ailələrinə və yaxınlarına səbir diləyir və yaralılara tezliklə sağalmağı arzulayıram.

Newscenter.az-ın xəbərinə görə, bu fikirləri səsləndirən Milli Məclisin deputatı Cavanşir Feyziyev sözlərinə görə, belə acımasız bir vəhşilik aktının arxasında Türkiyənin apardığı siyasətə qarşı çıxan və ölkədə sabitliyi pozmaq istəyən düşmən qüvvələr dayanır:

"Amma onlar heç zaman öz istəklərinə nail ola bilməyəcəklər. Türkiyə dünyanın lider dövlətlərindən biri kimi öz siyasətini öz xalqının milli maraqlarına uyğun şəkildə aparmaqda davam edəcək. Bu gün bütün dünya türklüyünün birlik yoluna çıxdığı bir zamanda heç bir qüvvə Türkiyəni və türkləri heç bir təzyiqlə qorxuda və öz yolundan döndərə bilməz. Türklərin özünə, kəndinə döndüyü bir zamanda yaşayıyırıq".

Millət vəkilinin sözlərinə görə, bütün dünya bilir ki, Türk özünə dönəndə necə möhtəşəm olur:

"Türklərin min illərə dayanan tarixi mübarizəsi dəfələrlə bunu bütün dünyaya sübut edib. Bu gün də kədəri bir, sevinci bir, qədəri bir olan dünya türkləri beynəlxalq terrorizmin təzyiq və təhdidlərinə qarşı birlikdə dayanır. Terrorçular və onları dəstəkləyən qüvvələr bilsinlər ki, Türkiyəyə əl qaldırmağa cəsarət edən istənilən qüvvə bütün türk dünyasının birləşmiş Dəmir Yumruğu ilə rastlaşacaq".

Ruhiyyə Mehdiyeva