Ərəb ölkələrinin kütləvi informasiya vasitələrində Misir-Azərbaycan Dostluq Cəmiyyətinin sədri Seymur Nəsirovun dünyada Qurani-Kərimin ən məşhur qiraətçisi olmuş Misir Qiraət Birliyinin ilk prezidenti Şeyx Əbdülbaset Muhəmməd Əbdüssəmədin məzarını və evini ziyarət etməsi barədə məlumat yayımlanıb.

Newscenter.az-ın xəbərinə görə, məlumatda deyilir ki, bu hadisə şeyxin anım gününün növbəti ildönümündə baş verib. Azərbaycan diaspor təşkilatının sədrini və tədqiqatçı-alimi şeyxin evinə onun oğlu, general-mayor Tariq Əbdüssəməd dəvət edib.

Şeyxin oğluna atasının qiraətinin Azərbaycanda da sevildiyi, tolerantlıq və multikulturalizm ənənələrinə sadiq dünyəvi dövlətimizin İslam irsinə diqqət və qayğısı, Misir-Azərbaycan əlaqələrinin qədim tarixi, azərbaycanlı alim və mütəfəkkirlərin İslam irsinə verdiyi töhfələr barədə ətraflı məlumat verilib. Əl-Əzhər Universitetində təhsil almış azərbaycanlı gənclərin hazırda iki dost ölkə arasında əlaqələrin möhkəmlənməsi, həmçinin ərəb ölkələri ilə mədəni əməkdaşlığın inkişafı istiqamətində çalışdıqları vurğulanıb.

General Tariq Əbdüssəməd xalqımıza böyük ehtiramını ifadə edib və atası ilə bağlı xatirələrini bölüşüb.

Səmimi qonaqpərvərliyə görə təşəkkür edən cəmiyyət sədri şeyxin ailə üzvlərini Azərbaycana dəvət edib.

Xatırladaq ki, Şeyx Əbdülbaset Muhəmməd Əbdüssəməd 1970-ci illərin əvvəllərində Quran tilavəti üzrə üç dünya çempionluğunu qazanan yeganə hafiz olub.

Qeyd edək ki, Seymur Nəsirov həm də Ərəb ölkələri üzrə Azərbaycanlıların Koordinasiya Şurasının Misirdəki əlaqələndiricisidir.

Mehman