BMqT-nin Azərbaycan nümayəndəliyi BMT-nin Azərbaycandakı Miqrasiya Şəbəkəsi üçün rəqəmsal pul köçürmələri mövzusunda virtual brifinq təşkil etdi. Şəbəkə üzvləri, BMT agentlikləri, səfirliklər, milli beyin mərkəzləri və QHT-ləri təmsil edən 30 nəfər iştirakçı BMqT-nin Azərbaycan nümayəndəliyi və onun tərəfdaşlarının pul köçürmələri üzrə fəaliyyətini müzakirə etmək üçün bir araya gəldi. Tədbir Beynəlxalq Miqrasiya İcmalı Forumunda (IMRF) qəbul edilmiş Tərəqqi Bəyannaməsinin miqrantlar üçün daha sürətli, daha təhlükəsiz və daha ucuz pul köçürmələri üçün rəqəmsal həllər, rəqəmsal və maliyyə inklüzivliyini təşviq etmək və əməliyyatlara çıxışı sürətləndirmək üzrə tövsiyələrinin davamı olaraq keçirilib.

Newscenter.az xəbər verir ki, tədbirin açılış mərasimində Şəbəkənin həmsədirləri BMT-nin Azərbaycandakı Əlaqələndirici Koordinatoru Vladanka Andreyea, BMqT-nin Azərbaycan nümayəndəliyinin rəhbəri Vladimir Qyorqiyev və həmçinin, Dövlət Miqrasiya Xidmətinin rəisi Vüsal Hüseynov çıxış etdilər. Natiqlər öz çıxışlarında miqrasiya sahəsində fəaliyyətləri dəstəkləmək və məqsədlərə nail olmaq üçün Şəbəkə daxilində birgə işin vacibliyini vurğuladılar.

Vladimir Qyorqiyev iştirakçılara BMqT-nin Azərbaycan nümayəndəliyinin Dövlət Miqrasiya Xidməti ilə birgə BMqT İnkişaf Fondunun maliyyə dəstəyi ilə həyata keçirdikləri “Azərbaycanda pul köçürmələrinin sosial-iqtisadi təsirlərinin gücləndirilməsi” layihəsi haqqında məlumat verdi.

Miqrantlar üçün pul köçürmələrinin əhəmiyyətinə diqqəti çəkən xanım Vladanka Andreyeva 2022-ci ilin ilk 6 ayı ərzində Azərbaycana 1,6 milyard ABŞ dolları məbləğində pul köçürmələrinin gəldiyini və bunun kifayət qədər böyük məbləğdə pul olduğunu vurğuladı.

Vüsal Hüseynov öz çıxışında qeyd etdi ki, pul köçürmələri miqrantların və onların ailələrinin dolanışığı baxımından həqiqətən də böyük əhəmiyyət kəsb edir. O, Beynəlxalq Miqrasiya İcmalı Forumunda (IMRF) qəbul edilmiş Tərəqqi Bəyannaməsinin tövsiyələrinin pul köçürmələri ilə bağlı məsələləri əhatə etdiyini xatırlatdı və BMqT-nin Azərbaycan nümayəndəliyinin Miqrasiya Xidməti ilə birgə həyata keçirdiyi layihənin müsbət nəticələr verəcəyinə ümidvar olduğunu bildirdi.

Çıxışlardan sonra BMqT-nin Regional Ofisinin Əmək Mobilliyi və Sosial İnklüzivlik üzrə Baş Mütəxəssisi Maykl Nyuson və beynəlxalq ekspert, tədqiqat qrupunun rəhbəri Anna Proxorova pul köçürmələri sahəsində BMqT-nin fəaliyyəti, pul köçürmələri hərəkətinin qiymətləndirilməsi hesabatı, pul köçürmələri üzrə maraqlı tərəflərin təhlili və xəritələşdirilməsi haqda iştirakçılara məlumat verdilər.

Tədbir iştirakçıları, həmçinin miqrasiya və pul köçürmələri ilə əlaqədar məsələlər üzrə fikir mübadiləsi apardı və layihənin məqsədlərinə çatmaq üçün tərəflər arasında əməkdaşlığın vacibliyini qeyd etdilər. Sual-cavab sessiyası zamanı yerli QHT-lərin nümayəndələri vətəndaş cəmiyyəti təşkilatlarının maliyyə xidmətlərinə çıxışın və rəqəmsal pul köçürmələrinin genişləndirilməsinə töhfə verməyə hazır olduqlarını bildirdilər.

Qeyd edək ki, adıçəkilən 2 illik layihənin əsas məqsədi Azərbaycanlı emiqrantların və Azərbaycanda yaşayan miqrantların, eləcə də pul köçürmələri zamanı Azərbaycanda və xaricdə vəsait alanların maliyyə inklüzivliyini və rəqəmsal maliyyə xidmətlərinə əlçatanlığını artırmaqla onların yaşayış səviyyəsinin davamlı inkişafına töhfə verməkdir.

Mehman