Uzun illər dövlətin ən yüksək kürsülərində oturub, millətin etimadını, dövlətin güvənini qazanmış bir şəxsin sonradan bu etimadı satması, xalqın maraqlarına xəyanət etməsi, əslində, təkcə bir fərdin deyil, bütöv bir dövrün mənəvi iflasını göstərir. Dövlətə xəyanət, dövlət çevrilişi etmək cəhdi – bunlar sadəcə hüquqi terminlər deyil, bunlar bir insanın vicdanının, mənəviyyatının tamamilə sıradan çıxmasının göstəricisidir.

Uzun illər “təcrübəli dövlət xadimi” kimi görünən, lakin arxada fərqli oyunlar quran, öz şəxsi mənafeyi naminə dövlətin təhlükəsizliyini risk altına atan belə şəxslər tarix qarşısında ən ağır cavabı verənlər sırasındadır. Onlar illərlə xalqın hörmətini, dövlətin etibarını istismar edərək özlərinə saraylar, rütbələr, adlar qazanıblar. Amma unutduqları bir həqiqət var idi: "Xalqın etimadı bir dəfə itirildimi, onu heç bir vəzifə, heç bir titul geri qaytara bilməz!"

Dövlət çevrilişi kimi çirkin niyyətlər daşımaq, xarici qüvvələrə arxalanmaq, vətənin sütunlarını içəridən sarsıtmaq – bu, sadəcə bir cinayət deyil, bu, mənəvi xəyanətdir. Belə şəxslər xalqın, dövlətin və gələcək nəsillərin yaddaşında satqın, xain, mənfəətpərəst kimi qalırlar.

Bugünkü Azərbaycan artıq o dövrləri çoxdan arxada qoyub. Cəmiyyət ayılıb, xalq düşünür, dövlətin dayaqları möhkəmdir. Nəinki Ramiz Mehdiyev, kimliyindən, keçmiş vəzifəsindən asılı olmayaraq, xalqın iradəsinə qarşı çıxan, dövlətin sabitliyinə zərbə vuran hər kəs qanun qarşısında cavab verəcək.

Belə insanlar üçün tarixdə yer yoxdur — onlar keçmişin qaranlıq səhifələrində qalmağa məhkumdurlar.

Anar Salehoğlu,
İctimai-siyasi fəal

Newscenter.az üçün