İsrail xalqı yalnız tarixi atmosferi “sifariş edən” deyil, həm də onu yaratmağa qadir olan xalqdır. O, bunu Əhd ideyası, qanun ənənəsi, yaddaşa hörmət, qarşılıqlı məsuliyyət prinsipi və mənəvi olanla dövlətçilik düşüncəsini birləşdirmək istəyi vasitəsilə həyata keçirir. İsrail sivilizasion ideyası hər zaman nizam anlayışı ətrafında formalaşmışdır: ailədə nizam, icmada nizam, qanunda nizam, yaddaşda nizam, insanın Tanrıya və insanın insana münasibətində nizam.
Məhz buna görə Qlobal Həmrəylik Şurasının yaradılması xüsusi məna daşıyır.

Newscenter.az xəbər verir ki, bunları Qlobal Həmrəylik Şurasının Qafqaz üzrə nümayəndəliyinin rəhbəri, beynəlxalq hüquq müdafiəçisi, Qafqaz Yəhudiləri Assosiasiyasının Azərbaycan nümayəndəliyinin rəhbəri David Seliverstov deyib. O bildirib ki, belə bir şura insanları yalnız formal şəkildə birləşdirən təşkilat olmamalıdır6

"O, birlik, məsuliyyət və mənəvi idarəetmə məkanı olmalıdır. Onun vəzifəsi dünyaya əmr vermək deyil, dünyada dialoq, ədalət və insan ləyaqəti atmosferinin formalaşmasına kömək etməkdir.

Qlobal Həmrəylik Şurası birlik naminə yaradılmışdır, çünki birlik olmadan xalqlar pərakəndə qüvvələrə çevrilir. O, idarəetmə üçün yaradılmışdır, lakin bu anlayışın ali mənasında — insanlar üzərində hakimiyyət kimi deyil, nizama, hüquqa və sülhə xidmət kimi. Həqiqi idarəetmə o yerdə başlayır ki, orada güc ilə mərhəmət, qanun ilə insanlıq, milli maraqlar ilə ümumbəşəri əxlaq arasında tarazlığı qorumaq bacarığı mövcuddur.

Bu kontekstdə İsrail xalqı tarixdən təcrid olunmuş subyekt deyil, xüsusi tarixi təcrübənin daşıyıcısıdır. Bu təcrübə dünyaya deyir: nizam yaddaşsız mümkün deyil, sülh məsuliyyətsiz mümkün deyil, hakimiyyət isə əxlaqi məhdudiyyətsiz mümkün deyil. Buna görə İsrail yalnız özünü müdafiə etmir. Daha dərin mənada o göstərir ki, hətta böyük faciələrdən sonra da dövlət qurmaq, institutlar yaratmaq, elmi inkişaf etdirmək, imanı qorumaq və eyni zamanda qlobal dialoqda iştirak etmək mümkündür".

David Seliverstov onu da qeyd edib ki, söhbət xarici hökmranlıqdan və ya digər xalqları idarə etmək hüququndan getmir:

"Söhbət daha yüksək bir kateqoriyadan — İsrail xalqının tarix və bəşəriyyət qarşısında daşıdığı mənəvi, əxlaqi və sivilizasion məsuliyyətdən gedir.

İsrail xalqı öz tarixi taleyində sürgünlərdən, təqiblərdən, müharibələrdən, Holokostdan, dövlətçiliyin yenidən dirçəlişindən, təhlükəsizlik uğrunda mübarizədən və milli kimliyin qorunması yolundan keçmişdir. Məhz buna görə onun missiyası yalnız milli mövcudluq çərçivəsində izah edilə bilməz. Dağıntı və faciə yaşamış xalq nizamın qiymətini xüsusilə dərindən anlayır. Ədalətsizlikdən keçmiş xalq qanunun əhəmiyyətini başqalarından daha dərin dərk edir. Minilliklər boyunca öz varlığını qoruyub saxlayan xalq sübut edir ki, nizam ordudan, siyasətdən və xarici hakimiyyətdən deyil, insanın daxili əxlaqi quruluşundan başlayır.

“Biz sifariş edirik” ifadəsi işlədildikdə, bunu belə anlamaq lazımdır: bəşəriyyət öz mənəvi vəziyyəti, məsuliyyət səviyyəsi, həqiqətə, ədalətə və birliyə münasibəti ilə formalaşdırdığı hakimiyyət sistemini əldə edir. Əgər cəmiyyət parçalanmanı seçirsə, xaosla üzləşir. Əgər paxıllığı və nifrəti seçirsə, münaqişələr doğurur. Əgər qanunu, həmrəyliyi və insan ləyaqətini seçirsə, nizam atmosferi yaradır".

Süleyman